या केंद्रामार्फत माहिती अधिकाराचा वापर करून नगरसेवकांचे प्रगतिपुस्तक बनविले जाते. त्यामुळे त्यातून मिळालेली माहिती ही अधिकृत आणि महापालिकेच्याच विभागातून मिळवलेली असते. बैठका आणि निधी या दोन निकषांवर नगरसेवकांचे प्रगतिपुस्तक बनविले जाते. बैठकांमधून नगरसेवकांची उपस्थिती, त्यांनी मांडलेले प्रश्न, समस्या, ठराव, हरकतींचे मुद्दे यांची माहिती मिळते. यामधून नगरसेवकांचा आपल्या प्रभागाकडे पाहण्याचा दृष्टिकोन, प्रभागातली त्यांना किती माहिती आहे हे कळते. तसेच निधीच्या माहितीमधून संबंधित नगरसेवकाला किती निधी मिळाला, किती खर्च झाला, तसेच कोणत्या कंत्राटदारावर, प्रभागातील कोणत्या कामांवर आणि प्रभागातील कोणकोणत्या ठिकाणी किती निधी खर्च झालेला आहे, याची माहिती मिळते. यामधून नगरसेवक आणि कंत्राटदारांचे संबंध ताडून पाहता येतात. प्रभागामध्ये एकाच प्रकारची कामे पुन्हा पुन्हा झालेली आहेत का हे कळते. तसेच प्रभागातील विशिष्ठ ठिकाणीच कामे झालेली आहेत का हेही पाहता येते.