संयुक्त महाराष्ट्राच्या ‘लढ्याची घोषणा मुंबई – बेळगाव – कारवार – बिदर – भालकीसह संयुक्त महाराष्ट्र झालाच पाहिजे’ अशी होती. यांपैकी मुंबई आपण १०७ जणांच्या हौतात्म्यानंतर मिळवली. पण बेळगाव, कारवार, खानापूर, निपाणी, बिदर, भालकी अजूनही कर्नाटकव्याप्त प्रदेश आहे. साराबंदीच्या चळवळीपासून सर्वोच्च न्यायालयाच्या खटल्यापर्यंत अनेक आघाड्यांवर लढाई चालू आहे. या लढ्यात जवळपास चार पिढ्या कामी आल्या, तरीही अद्याप यश आलेले नाही. एका अर्थाने हा राज्य पुनर्रचनेचाच अपुरा राहिलेला कार्यक्रम आहे.