आज मराठीपुढे जागतिकीकरणाचे आणि विद्याशाखांच्या तंत्रज्ञानाधिष्ठीत इंग्रजीकरणाचे जबरदस्त आव्हान उभे ठाकले आहे. मात्र साहित्यकेंद्री संशोधन व व्यावहारिक मराठीकडे दुर्लक्ष यामुळे मराठी विकासाच्या संशोधनाची विदारक अवस्था आहे. एकविसाव्या शतकातील मराठीच्या विस्ताराचे मार्ग शोधून काढण्यासाठी मराठीचे अनेक उपयोजित संशोधन-प्रकल्प कार्यान्वित करण्याची गरज आहे. त्यासाठी मुळात मराठीच्या संशोधनाची समयोचित आणि समाजोपयोगी मांडणी काय असावी यासाठी चाकोरीबाहेरील विचार येणाऱ्या काळात सातत्याने होत राहिला पाहिजे.