मराठी शाळांना अनधिकृत ठरवून त्या बंद करण्यासाठी आणि बंद न केल्यास फौजदारी कारवाई करण्यासाठी पुढे सरसावलेल्या शासनाच्या दडपशाहीचा निषेध करण्यासाठी दादर येथील मुंबई मराठी ग्रंथसंग्रहालयाच्या सुरेंद्र गावस्कर सभागृहात ‘लढा मराठी शाळांचा’ ह्या राज्यव्यापी परिषदेचे आयोजन करण्यात आले होते. शिक्षण हक्क समन्वय समिती, ग्राममंगल, मराठी अभ्यास केंद्र, समर्थ भारत व्यासपीठ आणि मराठी एकजूट ह्या संस्थांनी एकत्रितपणे या परिषदेचे आयोजन केले होते. महाराष्ट्रभरातील मराठी शाळा, डी.एड. - बी.एड. महाविद्यालयांचे प्रतिनिधी, संस्थाचालक, शिक्षक आणि मुख्याध्यापक या परिषदेस मोठ्या संख्येने उपस्थित होते. शिक्षण हक्क समन्वय समितीचे श्री. अरुण ठाकूर, ग्राममंगलचे विश्वस्त प्रा. रमेश पानसे, मराठी अभ्यास केंद्राचे अध्यक्ष प्रा. दीपक पवार, मराठी अभ्यास केंद्राच्या प्रा. वीणा सानेकर, भारतीय विद्यार्थी सेनेचे अध्यक्ष अभिजित पानसे, महाराष्ट्र नवनिर्माण सेनेचे प्रतिनिधी अनिल शिदोरे, पत्रकार शुभदा चौकर, शिक्षणतज्ज्ञ विजया चौहान आदी मान्यवरांनी आपल्या भूमिका मांडल्या.

या परिषदेच्या निमित्ताने प्रा. वीणा सानेकर यांच्या ‘लढा मराठी शाळांचा’ या पुस्तिकेचे प्रकाशन ज्येष्ठ शिक्षणतज्ज्ञ प्रा. रमेश पानसे यांच्या हस्ते झाले.